فلوس النت حقيقية ولا مضروبة

الجزء التانى من مقالتى فلوس النت حقيقة ولا مضروبة ..
اتمنى انك تقوم بمتابعة الجزء الأول لتتابع المقالة من البداية..
دى تانى طريقة علشان تكسب من على النت .. وهى برضه زى الطريقة الأولى مش متطلبة انك يكون عندك موقع … بس بتطلب انك تكون باحث كويس على الانترنت علشان تدور على المواقع دى ..

فكرتها نسبيا شبه الطريقة الاولى وهى زيارة الاعلانات .. ولكن فى الطريقة دى انت مش بتزور الإعلانات .. يعنى ايه ؟؟
نبتدى من الاول خالص …
فى بعض المواقع بتديك فلوس علشان تنشرها هى نفسها .. ودى بتسمى البيع بالعمولة (Affiliate) .. عادة المواقع دى بتقدم خدمات بيع عادية جدا سواء كانت متاجر إليكترونية ( Online Markets) أو شركات بتقدم خدمات معينة زى استضافة المواقع .. انت بتشترك على المواقع بتاعت الشركات دى وبتاخد منها رابط معين خاص بيك انت فقط .. بتقوم بتوزيع الرابط ده على اكبر عدد من الناس اللى هيشدهم نوعية الخدمة المقدمة من الموقع… لما الناس دى بتزور الرابط وبتشترى خدمة من الموقع انت بتكسب فلوس او بمعنى اصح عمولة على اللى الناس اشترته.. وطبعا بيبقالك حد ادنى علشان الشركة تحولك فلوسك .. وفى نوعيات كتيرة من المواقع دى موجودة على النت .. ولعل من اشهرها كان موقع VK المنافس لموقع الـ FaceBook واللى كان عامل مسابقة عالمية عن 40 Ipod مكسب لكل دولة علشان الناس تدعو اصحابهم يسجلو من خلال الروابط بتاعتهم الخاصة واللى يعمل دعوة لاكبر عدد من الناس ويكون مرتب فى اول 40 واحد على مستوى دولته يكسب Ipod هدية يتبعتله لغاية البيت ..
علشان تبدى تكسب من المواقع اللى زى كده .. ده بيتطلب منك انك تكون متواجد على شبكة الانترنت بشكل كبير وعندك علاقات كبيرة .. ولديك مصادر تقدر توزع من خلالها الروابط الاعلانية اللى بتكسبك فلوس .. وبرضه هيتطلب منك البحث المستمر عن اخر المواقع الجديدة على الساحة .. لان فى الاغلب مواقع الشركات بتكون ذات تمويل عالى ومن نحية تانية بتدور على مكسب بسرعة .. فبتنزل عروض العمولة ده دايما .. ولما بتكون من اوائل الاعضاء اللى شاركت معاها بتكسب بسهولة جدا .. يعنى انا اذكر ان الأول فى مصر فى بداية موقع الـ VK اللى اتكلمت عليه فوق .. لما دخل المسابقة وكسب الـ Ipod كان عدد الاعضاء اللى اشتركوا من الرابط بتاعه 23 عضو … دلوقتى احنا بتكلم على 400 عضو يشتركوا من الرابط بتاعك علشان تقدر تضمن لنفسك مكان فى أول 40 واحد عاملين دعوات لموقع الـ VK..
واخيرا الموضوع ده مالوش قواعد ثابتة .. ومحتاج مجازفة بشكل كبير .. لان انت بتجرب كل موقع وتشتغل عليه شوية وتشوف المكسب العائد فى الآخر ..
وخلى بالكم من مواقع النصب اللى بتنزل فى الموضوع ده .. وكان من امثلة المواقع دى انا مش فاكر اسمه بالظبط بس كان عامل حركة سخيفة شوية انه علشان تكسب دومين دوت كوم لازم تعمل دعوات لـ تسع اشخاص من الرابط بتاعك وبعد ما التسعة يسجلو ويأكتفو حساباتهم انت حسابك بيتأكتف تلقائى وتكسب الدومين .. لما انت بتعمل الدعوات واصحابك بيدخلو علشان يسجلو وبعد ما بيسجلو لازم يدعو 9 علشان حسابهم يتأكتف وبالتالى حسابك يتأكتف وبعد كده الـ 81 شخص اللى سجلو من خلال اصحابك لازم كل واحد فيهم يدعو 9 تانيين علشان حسابهم يتأكتف وبالتالى حساب اصحابك يتأكتف وبالتالى حسابك يتأكتف .. بمعنى آخر كانت دايرة مالهاش نهاية وهدفها انهم يجمعوا قاعدة بيانات كبيرة علشان يبتدوا يشتغلو بيها تسويق براحتهم من غير ما يدفعوا ولا نكلة فى تمنها …
فى النهاية انا عاوز اوضح ان الكسب عن طريق الانترنت هى عملية منطقية فى الأصل وبالتالى لما تلاقى كلام موقع غير منطقى ما تكملش معاه علشان هيتضح فى الآخر انه موقع نصب ..
اترككم فى رعاية الله وامنه
مع وعد بالجزء التالت فى سلسلة الربح عن طريق الانترنت…

محمد سليمان