فلوس النت حقيقة ولا مضروبة

اغلبنا سمع عن موضوع الربح عن طريق الانترنت واعتقد اقلية هما اللى صدقوه وكمان فكرو يقرو اى حاجة عنه .. انا هحكيلو فكرة الفلوس بتاعت النت دى بسرعة لانها فكرة كبيرة ..

فى اكتر من طريقة تخليك تكسب فلوس .. دلوقتى هنتكلم عن طريقة واحدة بس منهم وهى زيارة الاعلانات بشكل دورى ..
بتبقى كل مهمتك انك تزور اعلانات معينة بيحددها الموقع اللى انت مشترك عليه ليك .. وعادة فى الحساب المجانى بيبقى 5 او 6 مواقع يوميا .. بتزور الاعلان لمدة 30 ثانية وبعدها بتقفله وتزور الاعلان اللى بعده .. بتكسب فى زيارة الاعلان الواحد 1 سنت .. هتقولى طيب تمام بس ازاى؟.. اقولك المواقع اللى بتقدملك الخدمة دى هى فى الاصل شركات دعاية .. الناس بتروح تعلن عندهم .. فبيدخل واحد يقولهم انا عاوز اعلانى يشوفه مليون زائر يوم كذا مثلا .. يقولوله طيب تمام هات 5 الاف دولار .. الراجل بيدفع وتمام التمام .. هما يدخلوله منين مليون زائر؟ .. ياخدو من الفلوس اللى هو دفعها 1000 دولار بس ويوزعوها على المليون الزائر اللى هيدخلو الموقع او الاعلان بتاع الراجل ده وكده الزائر الواحد كسب 1 سنت .. بمعنى تانى انت قبضت من الراجل مقابل دخولك موقعه او اعلانه بس بطريق غير مباشر وهما كده كسبو 4 الاف دولار فى الاعلان الواحد .. تخيل انت مشترك فى المستوى المجانى فى ست مواقع من اللى بتقدم خدمة الربح عن طريق الانترنت .. وكل موقع منهم بيديك 6 اعلانات يوميا … بتزور الاعلان الواحد 30 ثانية .. يبقى انت كده بتزور فى اليوم الواحد 6 مواقع X 6 اعلانات = 36 اعلان يوميا .. وهتاخد وقت 36 اعلان X 30 ثانية للاعلان الواحد = 1080 ثانية = 18 دقيقة يوميا .. وكمان هتلاقى نفسك بتزور 36 اعلان X 7 ايام فى الاسبوع = 252 اعلان اسبوعيا و كمان 252 اعلان اسبوعيا X 4 اسابيع = 1008 اعلان فى الشهر .. وده معناه انت كسبت 1008 سنت شهريا .. يعنى حوالى 10$ .. هتقولى وايه يعنى .. فعلا بس ده اللى انت كسبته بس .. يعنى ايه ؟ .. يعنى انت كمان ممكن تعمل دعوة (invite) لاصحابك وتدخلهم معاك ولما يسجلو من اللينك بتاعك هتاخد نسبة على كل واحد سجل وكمان هتاخد نسبة على الفلوس اللى بياخدها .. طيب وهو كده صاحبى هيخسر حاجة ؟ .. لا خالص هو هياخد حسابه كامل .. وكل ما تزود عدد المواقع اللى انت مشترك فيها وتزود عدد اصحابك او الناس اللى مسجلة من خلال الرابط بتاعك (link ) هتكسب اكتر واكتر .. وكمان ممكن تشترك فى المواقع دى فى مستوى اعلى من المستوى المجانى .. ودى بتبقى مدفوعة .. وبتخليك يظهرلك اعلانات اكتر ممكن يوصلو لـ 20 اعلان فى الموقع الواحد .. طيب ياعم وانا اخد فلوسى ازاى ؟ .. اقولك انا يا سيدى .. فيهم مواقع بتبعت الفلوس بشيك لغاية باب بيتك .. ومواقع بتدفعلك من خلال بنوك اليكترونية تكون انت مشترك فيها ومن خلال البنوك الاليكترونية دى تقدر تحول فلوسك سواء هتبعتها للبيت او هتسحبها من خلال حساب مصرفى خاص بيك فى اى بنك انت مشترك فيه.
ياعم اغلب المواقع دى نصب ؟ .. فعلا اغلب المواقع دى نصب .. وده بيتطلب منك انك تبقى عارف ايه المواقع السليمة والمفروض تستخدمها علشان تكسب منها .. والمواقع دى بتبقى واخدة رينك عالى فى المجال ده ..
وقريبا هانزل لينكات المواقع اللى انا متأكد من التعامل معاها

محمد سليمان